Azərbaycanda dərs ilinin uzadılacağı gözlənilir

Azərbaycanda orta məktəblərdə tədris ilinin müddətinin dərs ilinin sonuna əlavə günlərin artırılması hesabına uzadılacağı gözlənilir…

Azərbaycanda orta məktəblərdə tədris ilinin müddətinin dərs ilinin sonuna əlavə günlərin artırılması hesabına uzadılacağı gözlənilir. Trend-in məluamatına görə, təhsil nazirinin müavini Ceyhun Bayramov jurnalistlərə bildirib ki, tədris ilinin müddətinin artırılması məsələsi Təhsil Nazirliyi tərəfindən irəli sürülüb.

Nazir müavini deyib ki, tədris ilinin müddətinin növbəti dərs ilində uzadılacağı gözlənilir. Ancaq bu il dərs ili planlaşdırılmış vaxtda başa çatacaq. Çünki dərs ilinin uzadılması tədris proqramları ilə bağlı olduğundan bunu dərs ilinin ortasında etmək düzgün olmaz: “Bizim apardığımız analizlər onu göstərir ki, Azərbaycanda cəmi 32 tədris həftəsi var. Bu, aşağı göstəricidir. Digər ölkələrdə bu müddət 38, bəzi ölkələrdə 40-43 həftəyə çatır. 32 həftə kifayət qədər qısadır. Tədris proqramları isə ağırdır, zaman keçdikcə bu yüngülləşmir. Dərs həftəsini azaltmaqla biz bir günə düşən dərs yükünü artırırıq. Bu da bir çox hallarda valideynlərin haqlı narazılığına səbəb olur “.

C.Bayramov deyib ki, əlavə tədris həftələrinin dərs ilinin əvvəlinə, yaxud sonuna artırılacağı ilə bağlı dəqiq qərar yoxdur: “Ancaq böyük ehtimalla bu, dərs ilinin sonuna günlərin əlavə edilməsi hesabına olacaq. Dərs ilinin 3 həftəyədək artırılması nəzərdə tutulur “.

Nazir müavini orta məktəb şagirdləri arasında ekstremist dini cərəyanların yayılmaması üçün din fənninin tədrisi məsələsinə də münasibət bildirib. C.Bayramov qeyd edib ki, hazırda din orta məktəblərdə ayrıca fənn kimi tədris olunmur. Ancaq müəyyən fənlər hesabına, məsələn, “Həyat bilgisi ” dərsliklərində dini bilgilər şagirdlərin yaş qruplarından asılı olaraq verilir. Burada müxtəlif dünya dinləri barədə məlumatlar verilir: “Tolerantlıq, bütün dinlərə hörmətlə bağlı dərsliklərdə məlumatlar var. Bundan sonra da biz bunları nəzarətdə saxlayacağıq “.

 

/Trend/