İctimai müzakirələr artıq başa çatıb…
İctimai müzakirələr artıq başa çatıb.
Bakı şəhərinin inkişaf planı martın sonuna kimi hazır olacaq.
Hazırda Bakı şəhəri və onun qəsəbələrinin sosial-iqtisadi inkişafına dair Dövlət Proqramında (2014-2016-cı illər) nəzərdə tutulan tədbirlərin də bu plana uyğunlaşdırılması üzərində iş gedir.
Oxu.Az APA-Economics-ə istinadən xəbər verir ki, bunu Dövlət Şəhərsalma və Arxitektura Komitəsi (DŞAK) beynəlxalq əlaqələr və informasiya şöbəsinin müdiri Cahangir Qocayev bildirib.
C.Qocayev əlavə edib ki, Böyük Bakının Regional İnkişaf Planı ilə bağlı ictimai müzakirələr artıq başa çatıb. Şöbə müdirinin sözlərinə görə, yaxın vaxtlarda Dövlət Komitəsinin sədri Abbas Ələsgərov mətbuat konfransı keçirəcək və planın yekun variantı ilə bağlı ictimaiyyətə ətraflı məlumat verəcək.
Qeyd edək ki, Böyük Bakının Regional İnkişaf Planı ilə paytaxtın nəqliyyat, yol, tikinti, ekoloji və s. problemlərinin həll edilməsi hədəflənib. 2030-cu ilədək həyata keçiriləcək layihəyə Bakı şəhərinin rayonları, Abşeron rayonunun bir hissəsi və Sumqayıt şəhəri daxildir.
/oxu.az/
