Müqavilələrin dəyəri təxminən 200 milyon ABŞ dolları həcmindədir…
Müqavilələrin dəyəri təxminən 200 milyon ABŞ dolları həcmindədir.
“Şahdəniz” konsorsiumu Mərhələ 2 işlənmə layihəsinin irəliləyişi çərçivəsində bu yaxınlarda daha iki xidmət müqaviləsini imzalayıb.
Oxu.Az xəbər verir ki, konsorsiumun operatoru “BP-Azerbaijan” şirkətindənAPA-Economics-ə verilən məlumata görə, sualtı axın xətlərinin örtüklənməsi və ilkin sualtı ixrac xəttinin örtüklənməsi işlərini əhatə edən bu müqavilələr “Bredero Shaw International B.V.” şirkəti ilə imzalanıb.
Müqavilələrin dəyəri təxminən 200 mln. ABŞ dolları həcmindədir.
Örtüklənmə işlərinə 2014-cü ilin sonlarında başlanacaq ki, 2015-ci ilə planlaşdırılan sualtı boru kəmərlərinin inşasının birinci mərhələsi üçün və 2018-ci ilə planlaşdırılan ikinci mərhələsi üçün örtüklənmiş borular təmin olunsun.
Ötən ilin dekabr ayında yekun investisiya qərarı verildikdən bu vaxtadək “Şahdəniz 2” layihələri üzrə işlərdə yaxşı irəliləyiş olub. Ümumilikdə artıq 9 mlrd. dollar dəyərində əsas mühəndis-layihələndirmə, tikinti və təchizat müqavilələri imzalanıb. Bu müqavilələr üzrə Azərbaycan və Gürcüstandakı əksər tikinti sahələrində ilkin işlər də artıq başlanıb.
Qeyd edək ki, “Şahdəniz” Mərhələ 2 layihəsi Xəzər dənizində yerləşən nəhəng “Şahdəniz” yatağından ildə 16 mlrd. kubmetr qazın hasil edilməsinə və bu qazın təxminən 3 500 kilometr uzunluğunda boru kəməri vasitəsilə Gürcüstan, Türkiyə, Yunanıstan, Bolqarıstan, Albaniya və İtaliyaya nəql olunmasına imkan yaradacaq. İlk qazın hasilatı və Gürcüstan və Türkiyəyə satışın başlanması 2018-ci ilin sonlarına nəzərdə tutulub; Avropaya isə ilk qaz təxminən bir il sonra çatdırılacaq.
