Dövlət Miqrasiya Xidməti Qusar rayonunda növbəti səyyar xidmət təşkil edib
Xaçmaz regional miqrasiya idarəsinin xidməti ərazisinə aid olan Qusarda əcnəbi və vətəndaşlığı olmayan şəxslər üçün səyyar xidmət təşkil edilib.
Dövlət Miqrasiya Xidmətindən (DMX) AZƏRTAC-a bildiriblər ki, səyyar xidmətin imkanlarından 46 şəxs istifadə edib. Onlardan 13-dən vətəndaşlıq mənsubiyyətinin müəyyən olunması, 7 nəfərdən müvəqqəti yaşama icazəsinin verilməsi ilə bağlı sənədlər qəbul olunub. Səkkiz şəxsə Azərbaycan Respublikasının ərazisində müvəqqəti yaşamaq üçün icazə vəsiqələri, 11 nəfərə vətəndaşlıq mənsubiyyətinin müəyyən olunması ilə bağlı arayış verilib. Yeddi şəxsə isə təqdim etdikləri sənədlərdə mövcud çatışmazlıqlar izah edilib, həmçinin DMX-nin funksiyalarına aid xidmətlərlə bağlı qanunvericiliklə tələb olunan sənədlərin siyahısı verilib.
Müraciət edənlər səyyar xidmətin təşkilinə görə minnətdarlıqlarını bildiriblər.
