135 min ailə ünvanlı dövlət sosial yardımı alır…
135 min ailə ünvanlı dövlət sosial yardımı alır.
Əmək və Əhalinin Sosial Müdafiəsi Nazirliyi tərəfindən ünvanlı sosial yardımın bankomatlar vasitəsilə alınması üçün verilmiş bütün plastik ödəniş kartlarının yeniləri ilə əvəz olunması nəzərdə tutulur.
Bu tədbir ünvanlı dövlət sosial yardımlarının təyinatı və ödənişi sistemində neqativ halların aradan qaldırılması və şəffaflığın təminatı istiqamətində aparılan islahat tədbirlərinin davamı olaraq həyata keçiriləcək.
Oxu.Az xəbər verir ki, Əmək və Əhalinin Sosial Müdafiəsi Nazirliyindən verilən məlumata görə, yeni plastik kartların sifariş olunması üçün Nazirlik yaxın vaxtlarda satınalmalar haqqında qanunvericiliyin tələblərinə uyğun şəkildə bank müəssisələri arasında müvafiq qaydada açıq tender keçirəcək.
Tenderin şərtlərinə uyğun olaraq hazırlanmış yeni plastik ödəniş kartları ünvanlı yardım təyinatı aparılmış vətəndaşlara bank müəssisələri tərəfindən şəxsən təqdim ediləcək.
Bu tədbir əvvəllər mövcud olmuş çatışmazlıqların aradan qalxmasına, təyin olunmuş yardımı almaq üçün verilən plastik kartların məhz aztəminatlı ailələrin özlərində olmasına gətirib çıxaracaq.
Qeyd edək ki, cari ilin 1 fevral tarixinə respublikada 135 min ailəyə ünvanlı dövlət sosial yardımı ödənilir.
